نظام الساعات المعتمدة

إفهم نظام الساعات المعتمدة

Basko
اخر تحديث :

نظام الساعات المعتمدة Credit Hours System:



- نظام الساعات المعتمدة دا النظام اللي ماشية بيه الكلية في كل الاقسام وكل اللغات سواء عربي او انجليزي او فرنش، والساعة المعتمدة دي يعني وحدة قياس المادة أو الوزن النسبي للمادة، في مواد بساعة وفي مواد بساعتين وفي مواد بتلات ساعات معتمدة وكل ما زاد عدد ساعات المادة معناه ان مدة المحاضرات الاسبوعية اللي المفروض تاخدها للمادة دي ازيد مثلا المادة اللي ب 1 ساعة هتاخدها محاضرة واحدة فالاسبوع لكن المادة اللي ب3 ساعات هتاخدها محاضرتين او 3 فالاسبوع
- المواد الأساسية كلها بـ 3 ساعات معتمدة لكل مادة، أما المواد الفرعية فيه مواد بـ 3 ساعات معتمدة وفيه مواد بساعتين وفي مواد بساعة واحدة، فنظام الساعات المعتمدة دا يقدر يساعدك تختار كل ترم عدد المواد والساعات اللي عايزها بالدكاترة اللي حابب تدرس معاهم، وتعمل الجدول بنفسك عشان تختار المواعيد اللي عايزها (ما عدا سنة أولى الكلية هي اللي بتعمل الجداول بالترتيب الأبجدي).
- عدد الساعات المتاحة إنك تسجلها في الترم الواحد لا تقل عن 12 ساعة ولا تزيد عن 19 ساعة، ومن الشروط الأساسية للتخرج إنك تكون مخلص 144 ساعة معتمدة طوال الأربع سنين (يعني مجموع المواد اللي خدتها طوال سنين الكلية يكون 144 ساعة ) لو حاسس انك تايه هتفهم اكتر لما تجرب 😂
_____________________________________________
🔵 مواد الفرقة الأولى :-
- المواد اللي بتدرسها في سنة أولى هي عبارة عن 6 مواد أساسية (3 مواد أساسية كل ترم)، وهي:
◼️ الترم الأول:
1️⃣ مبادئ العلوم السياسية 1 (3 ساعات).
2️⃣ مبادئ الإحصاء 1. (3 ساعات).
3️⃣ مبادئ الاقتصاد الكلي. (3 ساعات).
◼️ الترم التاني:
1️⃣ مبادئ العلوم السياسية 2. (3 ساعات).
2️⃣ مبادئ الإحصاء 2. (3 ساعات).
3️⃣ مبادئ الاقتصاد الجزئي. (3 ساعات).
- بالإضافة إلى مواد فرعية متاح إنك تدرس بعضهم في الترم الأول وبعضهم في الترم التاني من سنة أولى، وبتتبقى بعض المواد القليلة (مادتين تقريبًا أو تلاتة) بتاخدهم في سنة تانية في كل ترم مادة، والـ 9 مواد دول هي:
1️⃣ مبادئ القانون. (ساعتين).
2️⃣ مبادئ الرياضيات. (3 ساعات).
3️⃣ تطبيقات الحاسب الآلي في مجتمعات المعلومات المعاصرة 1. (3 ساعات).
4️⃣ تطبيقات الحاسب الآلي في مجتمعات المعلومات المعاصرة 2. (3 ساعات).
5️⃣ مبادئ الإدارة. (3 ساعات).
6️⃣ الإدارة العامة. (3 ساعات).
7️⃣النظام الاقتصادي المصري. (ساعة).
8️⃣ قراءات باللغة الأوروبية. (ساعتين).
9️⃣ التفكير النقدي. (ساعة)
- المواد الفرعية الـ 9 اللي قولتلك عنهم مش كلهم هتاخدهم في سنة أولى، في مواد فرعية هتاخدها في سنة أولى وباقي المواد الفرعية اللي هتتبقى من سنة أولى هتاخدها في سنة تانية مع مواد التخصص الرئيسي اللي هتدخله من بداية سنة تانية.
- يعني في الأغلب الجدول بتاعك بيكون فيه ٦ مواد أو ٧ مواد في الترم.
⬅️ مواد (مبادئ القانون - النظام السياسي المصري - التفكير النقدي): دول باللغة العربية حتى لو أنت في شعبة إنجلش.
⬅️ مواد (SSC 1 - SSC 2 - Readings In English): دول باللغة الإنجليزية حتى لو أنت في شعبة عربي.
- بص بقى الكلية بتديلك حد أقصى 18 أو 19 ساعة معتمدة تنقي بيها المواد، تمام لحد كدا؟ أنت ممكن تاخد 17 أو 16 ساعة معتمدة بس على حسب الجدول وعدد ساعاته
- اختيار التخصص الرئيسي بيكون من بداية سنة تانية (اقتصاد - إحصاء - علوم سياسية).
- قسم اقتصاد: بيكون فيه رياضة وإحصاء في سنة تانية وبيكونوا أوسع من سنة أولى، وفي سنة تالتة برضه بتكون في مواد ليها علاقة بالرياضة والإحصاء.
- قسم إحصاء: طبعًا كله رياضة وإحصاء وحسابات وتعقيد عشان كدا ناس قليلة جدًا اللي بتدخله، ولكن اللي بيحب المواد دي بتكون بالنسبة له مش صعبة أوي.
- قسم سياسة: مفيهوش رياضة إنما بتاخد الترم الأول من سنة تانية مادة واحدة احصاء فقط
_____________________________________________
تعديل المقال
الأقسام

مقالات قد تهمك

تعليقات