أولًا: نظام الكلية:-

نظام الكلية اسمه نظام الساعات المعتمدة ودا بينطبق على كل الشُعَب، وبيتيح للطالب إنه يختار المواد اللي عايز يدرسها في أي سنة حسب شروط المواد، والتقدير فيه بيكون مختلف شوية وأعلى من تقديرات الكليات اللي نظامها مش نظام ساعات معتمدة، يعني كلية الاقتصاد والعلوم السياسية بالقاهرة الامتياز فيها يبدأ من (90%) والساعة المعتمدة دي يعني وحدة قياس المادة أو الوزن النسبي للمادة، فيه مواد بساعة معتمدة واحدة ومواد بساعتين معتمدتين ومواد بتلات ساعات معتمدة (الساعة هنا مش مقصود بها اللي هي الساعة الزمنية المقدرة بـ 60 دقيقة).

المواد الأساسية كلها بـ 3 ساعات معتمدة لكل مادة، أما المواد الفرعية فيه مواد بـ 3 ساعات معتمدة وفيه مواد بساعتين معتمدتين وفيه مواد بساعة معتمدة واحدة، الفكرة إن المادة اللي بـ 3 ساعات معتمدة بتكون أصعب ومحتواها أتقل من المادة اللي بساعتين أو ساعة وبالتالي تقدير المواد اللي بساعات معتمدة أعلى بيؤثر على التقدير العام بشكل أكبر من تأثير المادة اللي بساعات معتمدة أقل، فنظام الساعات المعتمدة دا يقدر يساعدك تختار كل ترم عدد المواد والساعات اللي عايزها بالدكاترة اللي حابب تدرس معاهم.

عدد الساعات المتاحة إنك تسجلها في الترم الواحد لا تقل عن 12 ساعة ولا تزيد عن 19 ساعة، ومن الشروط الأساسية للتخرج إنك تكون مخلص 142 ساعة معتمدة طوال الأربع سنين (يعني تكون مجتاز عدد مواد تعادل 142 ساعة معتمدة).

الكلية فيها 3 شُعَب (العربية - الإنجليزية - الفرنسية) وكل شعبة ليها مصاريفها المختلفة.

الكلية 4 سنين والتقدير فيها تراكمي، وفي سنة أولى بتدرس مبادئ المواد عشان تحدد من بداية سنة تانية التخصص الرئيسي اللي هتتخصص فيه.

التخصص الرئيسي بيبدأ من سنة تانية، والتخصصات الرئيسية المتاحة 3 تخصصات (العلوم السياسية - الاقتصاد - الإحصاء).

التخصص الفرعي بيبدأ من سنة تالتة، والتخصصات الفرعية المتاحة 5 تخصصات (العلوم السياسية - الاقتصاد - الإحصاء - الإدارة العامة - الحوسبة الاجتماعية).

قسم الاقتصاد بيكون فيه رياضة وإحصاء في سنة تانية وبيكونوا أوسع من سنة أولى، وفي سنة تالتة برضه بتكون في مواد ليها علاقة بالرياضة والإحصاء.

قسم الإحصاء طبعًا كله رياضة وإحصاء وحسابات وتعقيد عشان كدا ناس قليلة جدًا اللي بتدخله، ولكن اللي بيحب المواد دي بتكون بالنسبة له مش صعبة أوي.

قسم العلوم السياسة مفيهوش رياضة إنما بتاخد الترم الأول من سنة تانية مادة إحصاء بس.

_____________________________________________

ثانيًا: نظام المحاضرات والسكاشن:-

مدة المحاضرات أو السكشن ساعة و20 دقيقة، وبيكون في Break بين كل محاضرة والتانية أو سكشن والتاني 10 دقائق.

بالنسبة للمحاضرات، أقصاها محاضرتين في الأسبوع لكل مادة، أما في بعض المواد ليها محاضرة واحدة فقط في الأسبوع.

المواد اللي ليها محاضرتين في الأسبوع:

- كل المواد الأساسية ليها محاضرتين في الأسبوع (مبادئ العلوم السياسية 1 - مبادئ العلوم السياسية 2 - مبادئ الإحصاء 1 - مبادئ الإحصاء 2 - مبادئ الاقتصاد الكلي - مبادئ الاقتصاد الجزئي).

- بعض المواد الفرعية ليها محاضرتين في الأسبوع (مبادئ الرياضيات - مبادئ الإدارة - الإدارة العامة - الـ Reading - الـ SSC 1 - الـ SSC 2).

المواد اللي ليها محاضرة واحدة في الأسبوع:

- بعض المواد الفرعية ليها محاضرة واحدة فقط في الأسبوع (النظام السياسي المصري - النظام الاقتصادي المصري - مبادئ القانون - التفكير النقدي) وممكن يكونوا محاضرتين حسب الدكتور.

بالنسبة للسكاشن، بيكون في سكشن واحد فقط لكل مادة أما في بعض المواد ملهاش سكاشن خالص (بتكون في محاضرات بس سواء محاضرة واحدة أو محاضرتين).

المواد اللي ليها سكاشن:

كل المواد الأساسية (مبادئ العلوم السياسية 1 - مبادئ العلوم السياسية 2 - مبادئ الإحصاء 1 - مبادئ الإحصاء 2 - مبادئ الاقتصاد الكلي - مبادئ الاقتصاد الجزئي)، وبعض المواد الفرعية (مبادئ الرياضيات - مبادئ الإدارة - الـ SSC 1 - الـ SSC 2) ليها سكشن واحد فقط في الأسبوع.

المواد اللي ملهاش سكاشن:

بعض المواد الفرعية (الإدارة العامة - الـ Reading - النظام السياسي المصري - النظام الاقتصادي المصري - مبادئ القانون - التفكير النقدي).

_____________________________________________

ثالثًا: مواد الفرقة الأولى:-

مواد الفرقة الأولى:-

- المواد اللي بتدرسها في سنة أولى عبارة عن (3 مواد أساسية كل ترم)، وهي:

الترم الأول:

1- مبادئ العلوم السياسية 1.

2- مبادئ الإحصاء 1.

3- مبادئ الاقتصاد الكلي.

الترم التاني:

1- مبادئ العلوم السياسية 2.

2- مبادئ الإحصاء 2.

3- مبادئ الاقتصاد الجزئي.

- بالإضافة إلى مواد فرعية وهما مواد بتاخد بعضهم في الترم الأول وبعضهم في الترم التاني من سنة أولى، وبتتبقى بعض المواد القليلة بتاخدهم في سنة تانية في كل ترم مادة، والمواد دول هي:

1- مبادئ القانون.

2- مبادئ الرياضيات.

3- تطبيقات الحاسب الآلي في مجتمعات المعلومات المعاصرة 1.

4- تطبيقات الحاسب الآلي في مجتمعات المعلومات المعاصرة 2.

5- مبادئ الإدارة.

6- الإدارة العامة.

7- النظام الاقتصادي المصري.

8- قراءات باللغة الأوروبية.

9- التفكير النقدي.

10- النظام السياسي المصري.

وفي مواد ليها شروط ومتطلبات قبلها يعني عشان تاخد سياسة 2 لازم تكون ناجح في سياسة 1، وعشان تاخد إحصاء 2 لازم تكون ناجح في إحصاء 1، وعشان تاخد إدارة عامة لازم تكون ناجح في مبادئ إدارة، وعشان تاخد تطبيقات حاسب آلي 1 لازم تكون ناجح في تطبيقات حاسب آلي 2، وعشان تاخد نظام سياسي مصري لازم تكون ناجح في سياسة 2.

_____________________________________________

رابعًا: نظام المذاكرة:-

الكلية مش سهلة عمومًا يعني ودا طبيعي شأنها زي شأن كليات كتير في مصر، ولكن في نفس الوقت مش مستحيلة، هي صعبة بس صعوبتها نسبية بتختلف من طالب إلى آخر، وصعوبتها نابعة من الضغط بس والحضور الكتير، فبتحتاج منك مجهود كبير ومذاكرة أول بأول عشان تقدر تجيب تقدير كويس وتقدر تحافظ عليه طوال الأربع سنين، فلازم تتابع المحاضرات باستمرار عشان متتراكمش عليك خصوصًا إن بتكون في كويزات (امتحانات قصيرة) كتيرة كل فترة فلازم تذاكر كويس وتسمع المحاضرات والسكاشن وتحل الشيتات عشان تجيب درجات كويسة في الامتحانات سواء الكويزات أو الميد ترم أو الفاينال.

في مواد بيكون ليها كتب ورقية أو كتب PDF وبيكون المصدر الأساسي للمذاكرة منها، ولكن في مواد تانية مش بيكون ليها كتب وبيكون المصدر الأساسي للمذاكرة من الـ Slides (الـ PDF أو الـ PowerPoint)، وفي مواد بيكون المصدر الأساسي للمذاكرة الكتاب والـ Slides بالإضافة إلى المحاضرات والسكاشن، في الأول والآخر الدكتور هو اللي بيحدد المصدر الأساسي للمذاكرة في مادته.

_____________________________________________

خامسًا: نظام الجداول:-

الكلية في بداية الدراسة بتنزل حوالي 11 أو 10 جدول (Track) كل جدول فيه عدد مواد معين بعدد ساعات مختلفة، ودكاترة مختلفين ومواعيد مختلفة، والطلبة بتتحط في الجداول دي حسب الترتيب الأبجدي، وكل جدول هيكون موضح فيه أيام المحاضرات وأيام السكاشن ومواعيدها وقاعات ومدرجات المحاضرات ودكتور المقرر.

في أيام ممكن تلاقي فيها محاضرة واحدة بس، وفي أيام ممكن تلاقي فيها محاضرتين أو تلاتة أو أربعة أو خمسة حسب كل جدول.

السكاشن كلها بتكون في يوم واحد وغالبًا بيكون يوم السبت أو الخميس (بيختلف عددها حسب المواد اللي ليها سكاشن والمواد اللي ملهاش سكاشن في جدولك)، وبيكون في يوم مفيهوش محاضرات ولا سكاشن غير طبعًا يوم الجمعة الإجازة، وشعبة عربي بتكون السكاشن يوم الخميس أما شعبة إنجلش وفرينش فالسكاشن بتاعتهم بتكون يوم السبت في الأغلب.

_____________________________________________

سادسًا: نظام الحضور والغياب:-

نظام الحضور والغياب في كليتنا بيختلف حسب الدكتور، وفي دكاترة بتحط درجات من أعمال السنة على الحضور، وفي دكاترة بتحط درجات أعمال سنة على المشاركة كمان، فلازم تحضر المحاضرات في الكلية عشان تفهم المادة والمحتوى بعيدًا عن درجات الحضور كمان اللي هتكون دافع أول ليك عشان تحضر، خصوصًا المواد اللي فيها رياضة أو إحصاء أو اقتصاد بيكون مهم جدًا ليك حضورها عشان تفهم المادة بشكل كويس.

_____________________________________________

سابعًا: نظام الدرجات:-

المادة من 100 درجة، وتقسيم الدرجات بيكون كالتالي:

- 50 درجة أعمال السنة (20 درجة ميد ترم + 30 درجة دول بيختلف تقسيمهم حسب كل دكتور، يعني ممكن دكتور يعمل كويزات ويخلي مجموع درجاتها 30 درجة، وممكن دكتور يعمل تكليفات بس ويخلي مجموع درجاتها 30 درجة، وممكن دكتور يخلي 20 درجة على الكويزات أو التكليفات ويخلي 10 درجات على الحضور والمشاركة).

- 50 درجة امتحان الفاينال.

_____________________________________________

ثامنًا: نظام الامتحانات:-

بتكون في امتحانات كتيرة في الترم، بيكون في امتحان منتصف الفصل الدراسي (الميد ترم - 20 درجة) ودا بيكون في الأغلب في الأسبوع السادس أو السابع من الدراسة، وبتكون في كويزات باستمرار، يعني في بعض المواد ممكن دكتور يعمل 3 كويزات أو 4 في الترم وبيحسبلك أعلى درجات منهم، وممكن دكتور يكتفي بكويزين ويحسب درجتهم معًا، وفي دكاترة بتدمج بين الكويزات والتكليفات والأبحاث، وطبعًا امتحان الفاينال في كل مادة.

تعديل المقال